Дакудава. Тут з'явілася адна з першых на Лідчыне ўніяцкіх парафій. Царкву пабудаваў на пачатку XVII ст. маршалак ВКЛ Юры Радзівіл. Гэта дазволіла частцы жыхароў Дакудава выйсці з кальвінісцкага прыхода, створанага яго дзедам.
У Архіве ўніяцкіх мітрапалітаў адклаўся кампрамат на дакудаўскага параха Георгія Вяржбіцкага, які на працягу трох дзён 15-17 чэрвеня 1758 г. павянчаў незаконны шлюб (муж і жонка былі паміж сабой у другой ступені сваяцтва) і пабіўся з гусеўскім парахам Васілём Лыткоўскім [1].
У 1774 г. замест старой была пабудавана з дрэва новая прыхадская царква Раства Багародзіцы [2]. Царква, якая зараз ёсць у Дакудаве, была ўзведзена ў 1866 г. з бутавага каменю недалёка ад месца ранейшага храма.
[1] Описание документов архива западнорусских униатских митрополитов. Т. 2. СПб., 1907. С. 193.
[2] Материалы для географии и статистики России, собранные офицерами генерального штаба. Виленская губерния. СПб., 1861. С. 550.