Герб горада Ліды, наданы 17 верасня 1590 г.
Сабакінцы (зараз - вёска Першамайская). Паводле народнага паддання, сваю назву мястэчка атрымала ад размешчанай тут каралеўскай псарні (сабакінцы - псары). Невялікая парослая лесам горка ў некалькіх вярстах ад мястэчка называлася "Каралеўскай дубровай". Падданне гаворыць, што тут, па дарозе на паляванне, спыняўся кароль [1].
У пачатку ХІХ ст. у мястэчку стаяла драўляная Свята-Пакроўская царква, пра час пабудовы якой звестак не захавалася. Аднак звон на царкоўнай званіцы са зробленым на ім лацінкай надпісам датаваўся 1506 годам [2].
У царкве знаходзілася яшчэ адна рэліквія - цудадзейны абраз найсвяцейшай Багародзіцы на халсце, прымацаваным да дошкі. У пачатку XVIII ст. на гэтым абразе з'явілася срэбная дошчачка, ахвяраваная царкве каралём Станіславам Ляшчынскім, з польскамоўным надпісам на ёй: "Najjasniejszy Stanisław Leszczynski król Polski przybywszy do Cudownego Obrazu Matki Najswietszey w Sabakinach pieszo - takowe wotum ofiarował roku 1705" ("Яго Вялікасць, кароль Польскі, прыбыўшы пешшу да цудатворнага абраза Божай Маці у Сабакінах, зрабіў гэтае прынашэнне ў 1705 г." [3]).
Храм з бутавага каменю і цэглы, які сёння стаіць у Сабакінцах, быў пабудаваны ў 1830 г.
[1] Труды Виленского отделения Московского предварительного комитета по устройству в Вильне IX Археологического съезда. Отдел II. Вильна, 1893. С. 109.
[2] Тамсама. С. 110.
[3] Материалы для географии и статистики России, собранные офицерами генерального штаба. Виленская губерния. СПб., 1861. С. 549.