Герб горада Ліды, наданы 17 верасня 1590 г.
Стар. 63
19. 1523.08.15/1555.11.12
Потвержене Войтеху Юхновичу Михаловскому на имене Рачкишки и на службу людей в Куткинятех [...] ему, от князя Павла Голшанского, бискупа луцкого, записанные навечность.
Жыкгимонътъ Августъ, Божъю м(и)л(о)стью король польский, великий князь литовъский, руский, пруский, жомоитский, мазовегцкий и иных.
Чинимъ (1) знаменито симъ нашимъ листомъ, хто на него посмотрить або, чтучи его, услышить, нинешнимъ и напотомъ будучимъ, кому будеть потребъ того ведати.
Билъ намъ чоломъ бояринъ нашъ Войтех Юхновичъ Михайловский и поведилъ передъ нами. Што жъ князь Павелъ, бискупъ виленьский, кн(я)же Гольшанское первей сего, будучи бискупомъ луцкимъ, за службы его, которые онъ ему, пану своему, чинилъ ку именеью его Рачкишъкамъ (2), што онъ подъ кн(я)же бискупомъ виленьскимъ у Гольшанех з давных часовъ с предковъ своих маеть, придалъ ему тамъ же у Голшанех в Куткенятех службу людей на ймя Ивана Артимцовича с потужникомъ его Станчикомъ, и землю Ивошкову Поскевского, и к тому огородъ в месътечку Голшанскомъ, Веприновский, на корчму. Яко жъ и листъ свой, потверъжаючи ему то навечность и дозволяючи ему якъ с тымъ именьемъ отъчизнымъ Рачкишками, такъ тежъ и с тою службою людей и зешлями вышейменеными по смерти своей кому хотечи служити и тое именье, со всимъ тымъ супокойне водле воли своее держачи, его уживати. Яко жъ и тотъ листъ, данину князя Павла, бискупа виленьского, передъ нами он покладалъ и билъ намъ чоломъ тотъ бояринъ нашъ Войтех Михаловъский, абыхмо ему в томъ ласку нашу г(о)с(по)д(а)ръскую вчинили и водле тое данины небожъчика князя бискупа виленьского его // [20] заховали: и тое именье Рачкишки, и службу людей, и земли вышеймененые листомъ нашимъ навечность ему потвердили. Которого жъ мы листу, данины князя бискупа виленьского, огледавши, казали есмо его в сесь нашъ листъ слово отъ слова вписати. Которий
Стар.64
такъ ся в собе маеть: "Я, князь Павелъ Алекъсаядровичъ, з Божее м(и)л(о)сти бискупъ луцкий и берестейский, чинимъ знаменито симъ нашимъ листомь, нинешнимъ и напотомъ будучимъ.
Билъ намъ чоломъ бояринъ нашъ голшанский Войтех Юхновичъ Михаловъский и поведилъ передъ нами. Ижъ што, дей, первей сего мы з ласки нашое придали ему за службу его ку отъчизне его Рачъкишкомъ люди и земли, то есть люди на имя Ивана Арътимцовича с потужникомъ своимъ Станчикомъ в Нуткинятех (3), службу, и землю Ивашкову Повлевского, и к тому у Голшанех огородъ Веприковъский на корчму. На што жъ ему есмо и листы наши паперовые з нашими печатьми подавали, которые онъ передъ нами указывалъ. Нижли, дей, онъ с потомъствомъ своимъ для того, ижъ тая дата наша на папери есть дана веку и с того а спокойливого держанья бесъпечонъ не есть, и просилъ нас за то, абыхмо якъ тую всю дату нашу, такъ и все именье, отъчизну его, особливымъ листомъ нашимъ паркгаменовымъ ему навечность потвердили.
А такъ, мы, паметаючи на его верные а пильные послуги, то на его чоломъбитье его (4) есмо вчинили и тые вышейписаные люди и земли ему и потомкомъ его навечность дали. Маеть то онъ, жона, дети и напотомъ будучие щадъки их ку отъчизне своей Ратаишкамъ вечне держати и въживати, а намъ якъ з отчизны, такъ и с тое выслуги своее службу боярскую конъно, збройно до живота нашего служити по тому, якъ и иншие бояре наши шлягга намъ служать.
А по животе нашомъ вже онъ самъ, дети и потомки их волны будуть с тымъ всимъ именьемъ своимъ кому // [20 адв.] хотя служити, а кревные наши до того ничего мети не мають.
И на то даемъ и навечность потвержаемъ ему и потомкомъ его симъ нашимъ паркгаменовымъ листомъ з нашою привесистою печатю.
П(и)сан у Янове, подъ лета Божего нароженья тисяча пятьсотъ двадцать третего, м(е)с(я)ца августа пятогонадцать дня, инъдикта второгонадъцаат.
Раиlus Ериs Н". (5)
А такъ, мы, г(о)с(по)д(а)ръ, бачечи в томъ прозбу его быта слушную, з ласки нашое г(о)с(по)д(а)ръское на чоломъбитье его то вчинили, и тотъ листъ данину небожчика князя Павла, бискупа виленьского, при моцы зуполной зоставили и тымъ листомъ нашимъ зоставуемъ. И тое именье Рачкишки, лежачое в Голшанех, и службу людей, землю и огородъ в местечку Голшанскомъ, ку тому именью его Рачкишкому отъ небожъчика князя бискупа виленьского приданые, зо всимъ на все, яко ся тое именье и тая служба, и людей земля, и огородъ самъ в собе маеть, тому боярину нашому Михаловскому самому и его жоне, детемъ и потомкомъ их и на вечные часы потвержаемъ.
Маеть онъ то все, на себе держачи, и того вживати водле листу, данины небожчика князя Павла, бискупа виленского, а намъ с того службу земскую военьную поспол з ыншими бояри-шляхтою под хоруговью хоружъства Ошъмянского служити.
А близкие и кровные, приятели небожъчика князя Павла, бискупа виленьского, того именья Рачкишского и тое службы людей, и земли, и огорода в Голшанех вышеймененых на немъ пойскиватчи и никоторое трудности задавати ему в томъ не мають, але во всемъ противко ему и потомкомъ его водле того листу, данины князя Павла, бискупа виленьского, заховатися они мають. И на то мы Войтеху Михаловскому // [21] дали сесь нашъ листъ, до которого и печать нашу привесити есмо казали.
Стар. 65
Писан у Вильне, лета Божьего нароженья тисяча пятьсотъ пятьдесятъ пятого, месяца ноябра 12 дня.
Подписъ руки короля его милости.
Янъ Гайко писар.
1 Напісана вялікімі літарамі, стылізаванымі пад друкаваныя.
2 Далей прочырк на пяць літар.
3 Так у ркп.
4 Натсана над радком.
5 Подпіс біскупа віленскага перададзены лацінкай, другое слова пад цітлам, трэцяе скарочанае ў выглядзе манаграмы (князя Гальшанскага) з крыжыкам на верее.