Ларыса Пятроўна Кавалеўская нарадзілася ў 1953 годзе ў вёсцы Каўшары Іўеўскага раёна. Скончыла 10 класаў Трабскай сярэдняй школы. Працавала ў Іўі старшай піянерважатай, у гэты перыяд і пачала пісаць вершы. Пасля пераезду ў Ліду служыла ў вайсковай часці ў Паўднёвым гарадку, працавала на розных работах. Зараз на пенсіі. Вершы піша на беларускай і рускай мовах. Друкавалася ў "Лідскай газеце".
Бацькаўшчына
Дзірваны, дзірваны, дзірваны…
Увайшлі ў вёску маю, абступілі…
Ды вятры, як пустыя званы,
Грукацяць цяжка ў скроні хаціны.
Цішыня не дае мне дзвярэй адчыніць,
Запрасіць ветла ў хату, як маці.
І няма ўжо каму так пяшчотна любіць
Завітаўшага ў госці дзіцяці.
Мая малая радзіма
О, край мой родны, як мне любы
Твае крутыя берагі,
І клічуць моцна так дадому
Яшчэ шматтраўныя лугі.
Рамонкі вочкамі мігаюць,
Нібы іскрынкамі расы,
І так сардэчна запрашаюць
У лесу засень верасы.
Непадалёку дуб кашлаты
Бярозе голле працягнуў
І, нібы хлопец зухаваты,
Ёй пра каханне штось шапнуў.
Усё тут міла так і люба:
І закаханы пошум дуба,
І плёск блакітнае ракі.
Ды ў паднябессі трапятліва
Чаруюць песняй жаўрукі.