Герб горада Ліды, наданы 17 верасня 1590 г.
Гэтая праца ёсць працягам стварэння інфармацыйнага каталога пра наяўнасць і месцы захоўвання дакументаў па гісторыі Беларусі. У 1999 г. быў выдадзены першы выпуск даведніка "Дакументы да гісторыі царквы ў Беларусі XV-XIX стст. у фондзе "Канцылярыя мітрапалітаў грэка-уніяцкіх цэркваў у Расіі" з Расійскага дзяржаўнага гістарычнага архіва ў Санкт-Пецярбурзе".
Другі выпуск даведніка прысвечаны кіеўскаму і львоўскаму дзяржаўным гістарычным архівам Украіны. У яго ўвайшлі дакументы па гісторыі ўніяцкай царквы ў Беларусі XVI-XX стст.
У трэцім выпуску даведніка "Дакументы да гісторыі царквы ў Беларусі XVI-XX стст." пададзена апісанне дакументаў, што захоўваюцца ў фондах дзяржаўных гістарычных архіваў Літвы і Расіі.
Артыкулы апісання асобных спраў згрупаваныя па архівах: у першай частцы пададзеныя назвы спраў па гісторыі ўніяцкай царквы Беларусі, выяўленыя ў Дзяржаўным гістарычным архіве Літвы, у другой - у Расійскім дзяржаўным гістарычным архіве ў Санкт-Пецярбурзе, а ў трэцяй - у Расійскім дзяржаўным ваенна-гістарычным архіве ў Маскве.
Крытэрыем адбору спраў былі прыналежнасць іх да гісторыі Беларусі альбо беларускае паходжанне.
Справы пададзеныя ў тым парадку, у якім яны размешчаныя ў вопісах фондаў архіваў з захаваннем пошукавых даных спраў. Гэта дае магчымасць беларускім даследчыкам рабіць адбор матэрыялаў паводле неабходнай тэматыкі са спасылкамі на пошукавыя даныя. Кожная легенда даведніка адпавядае апісальнаму артыкулу вопісу і тытульнаму лісту справы ў архівасховішчы. Легенда складаецца з:
1) загалоўка архіўнай справы, 2) даты, 3) нумара справы, 4) нумароў аркушаў, на якіх месціцца дакумент.
Да даведніка прыкладаецца навукова-даведачны апарат: імянныя і геаграфічна-тэматычныя паказальнікі да кожнай часткі, спіс скарачэнняў, тлумачальны слоўнік. У дадатках змешчаны пералік каталіцкіх манастыроў, зачыненых у 1831-1832 гг., які склалі супрацоўнікі Расійскага дзяржаўнага ваенна-гістарычнага архіва, і пададзена фіксацыя сучаснага стану пабудоваў, што раней належылі ўніяцкай царкве.
Выданне не прэтэндуе на вычарпальную падачу ўсіх крыніцаў па гісторыі ўніяцкай царквы, якія адсутнічаюць на Беларусі.
С.І. Паўловіч